Panduan berPesBuk 4 - Peti Undi

Ado cagho mudah untuk kito buek pungutan sogho. Cando pilihan ghayo lak yo? hehehe.. Tatapi, kamudahan ini banyak guno sabana ea. Di antagho ea iyolah:

1. Mancaghi pasatujuan sasuatu usul (isu)
2. Mandapek tau sambutan sasuatu pakagho
3. Mandapek an usul-usul tambahan dsb

Untuok manggunoan kamudahan tasabuit, cuit pado menu "Ask Question" cando dalam gamba di bawah ko:

Cuit pulak "Add Poll Options" kok nak yang lelain ngundi.

Kok nak urang lain manambah an pilihan, bia an panado (tick) tu kek sinan tapi kalau indak maun tambahan cadangan, buang yo bondo Allah tu. manyamak an yo nanti.


Mulokan manulih cadangan di siko. Lotak lah apo ko bondo ea. Taghang an babatuo kek sinan supayo urang lain paham undi tu untuok apo.


Bagi an pilihan cadangan untuk dipilih sakurang-kurang ea duo. kok ciek yo tak payahlah nak manyusah dighi. Tu bukan cadangan namo ea tapi kemahuan. hikhikhik

Dan satalah salasai sado ea. Cuit butang "Post" yang kala bighu tu. Jangan lo dicuit jo jaghi! Den kaghek jaghi tu kang!

Panduan berPesBuk 3 - Manjampuit Kandughi

Ado sia yang nak manikah ko? Atau nak manikah an anak ko? Atau nak manikah laie? Erkss?!!! Hehehe.

Pesbuk ado manyadio an kad jamputan pacumo. Tak payah nak tampah-tampah kad kek kadai. Setem tak payah pakai. Posmen tak payah guno. Awak pun tak payah nak malilau daghi ghumah ka ghumah.

Kek siko pun kito buleh tantu an kek sia nak di anta (tantu ea la yang ado dalam Pesbuk tu.) dan mintak paja-paja nun kompom kan kok nak datang ko tidak. Cando jamputan Dinner gak la.

Apo yang nak dibuek cumo klik yo kek menu "Create Event" cando kek gamba sabalah ko. Menu ko ado kek sabalah kanan untuk Group atau kek bawah gamba kalian yang santiang untuk pasandirian. Kok tak nampak gak (ghabun yo cando den ni ha?) klik yo gamba tu untuk gamba gadang.

Iko lo ghupo ea salapeh di klik menu di ateh tadi. Paghati batuo-batuo sabalum den mulo an caghito 1001 malam kajap laie






Mamulo sekali ialah gamba kok ado. Tempek an yo la gamba baghuok sanang ko kek sinan. kan sanang.

Tapi, kok ado logo atau gamba yang manggamba an karamaian tasabuit lagi elok. Nak anta jamputan bia ikhlas. Klik yo kek anak panah kala meghah tu.

Dah biaso tengok menatang ni ? Macam la tak biaso. Tak kan ini pun den nak caghito.

1. Tantu an tarikh bilo nak diado an kadughi.
2. Tantu an pulak maso jamuan dimulokan. Lambek capek tatamu tu lantak yo la.
3. Kok ado lak tamat tempoh ea, tantu an la pulak puko bagha majlis basurai. Kang ado la pulak yang manonggok tak ghati nak balik.

Kek siko tulih an apo karamaian ea yo? (bukan tulih jo pensel doh) Kok nak baghalek gadang ko, epi befdei ko, tahlil ko, cuko remos ko, korban pacintaan ko. Apo yo la.

Kan sanang. Memacam bulieh buek kan? Tak kalua duiek pun. (Tutuit lo kadai printing. hihihi)

Yang elok ea kek siko masuok an namo tampek yang didaftarkan kek "Goggle Map". Bia sanang urang nak mancaghi ea nanti. Tak payah awak nak menjawab tipun maso dio urang malilau. Poto dah ado.

Klik kek "Add Street Address" untuk masuok an alamat panuoh.

Ado mukadimmah, alu-aluan, ucapan, pasanan atau apo yang tabuku di ati? Masuok an kek siko.

Nak tulih panjang ko. Nak tulih pendek ko. tak nak tulih langsuong ko. Suko ati la. Bukan den punyo pun. hehehehe.


Ko bahagian yang paling kritikal (kecek Sasterasawan lak. hehehe)
Siko tampek manantu an sia yang nak dijampuit.

Kok nak manjampuit cumo kengkawan yang ado dalam senarai sandighi yo, klik butang ni. Lapeh tu pilih yo. Asalkan katigo-tigo pilihan tu dibuang panando ea.

Kok nak buek jamputan tabuko guno an menu di bawah tadi.

1. Manjampuit sado ea yang ado dalam sesatu kumpulan/group, tak kigho dah ADD ko lun sabagai pren.
2. Manjampuit sado ea yang ado dalam Pesbuk. Kok dicuit panando ea nanti kalua pilihan untuk dio bawak kawan ko tidak. Sah gadang alek ko. hehehe
3. Pilihan katigo iyolah manantu an samo ado nak ditayangkan ko tidak namo tatamu yang dah kompom nak datang.

Dan akhir sakali, cuit butang ko untuk mengkompomkan borang. Kok tak dicuit, sado yang dibuek tadi sio-sio yo la. hehehe

Panduan berPesBuk 2 - Manapih pasanan ka dalam Inbox emel.

Apobilo kito masuok dalam ciek atau labieh daghi ciek kumpulan (group), kito salalu mandapek babaghih pasanan yang masuok ka dalam "Inbox" emel kito. Kengkadang paneh yo ati dibuek ea sabab tapakso lah mangameh ea. Jadi untok mamudah an kajo tadapek cagho manapeh emel yang masuok dek entri atau komen kengkawan.

Cubo tengok kek sabalah kanan namo kumpulan tasabuit. Nampak tak butang "Edit Settings" kek sinan? Kok tak nampak gak, capek tuka wasiat tu ateh namo den yo? hihihi

Cuit yo bando Allah tu. Nanti kalua la gamba baghu yang labieh santiang cando ko:
Tadapek duo pilihan utamo kek sino:

1. Also send an email to:
   makno ea, pasanan yang dimasukan dek kengkawan di siko akan di anta taghuih ka emel kito. Kok dipadam an penando kek sinan mako "Inbox" dalam emel kito akan kaghieng kontang. Osah pamaleh lo urang ko. hihihi
2. Send me group chat messages
   makno ea, apobilo kito ditaghiek masuok dalam sesuatu sidang kumpulan mako apo yang yang dibughak an kek sinan akan sampai kek "Inbox" emel kito. Kok manyampah banyak nak kecek ea, padam an yo panando tu.

PAHATIAN!
Jangan padam panado tu jo gatah sekrap atau yang sawaktu dangan ea (rubber eraser). tepek an yo jo samba balacan atau tenyeh jo ayer lio. kok tak yo padam, buang an yo skrin monitor tu. kahkahkah

Kito buleh yo manantu an janih pasanan yang ndak kito taghimo.
Tadapat ampek pilihan kek siko:

1. A member posts or comments
   Makno ea: sado Allah yang ditulih dek ahli kumpulan tu akan masuok ka dalam "Inbox" emel kito samo ado masukan topik baghu ataupun komen mangomen ea sakali
2. A member posts
   Makno ea: Cumo topik baghu yo yang akan masuok. Sakigho ea kito tak buek komen kek sinan, komen-komen lain dalam topik tu tak masuok laie dalam "Inbox" emel kito. Abih camtu yo.
3. A friend posts
   Makno ea: Cumo topik yang dibuek oleh urang yang dah kito "ADD" sabagai kawan kito yo akan sampai ka emel kito. Yang tak kawan tu tak ado kojo posmen nak manganta ea. Asal jangan mangawan yo sudahlah.
4. Only posts I am following
   Makno ea: cumo post yang kito ado buek komen atau yang kito pilih untuk ikuit akan masuok sampai ke "Inbox" emel kito. Kalau kito cuit butang "Like" pun bamakno kito ikuti topik tasabuit yo. Cam mano nak pilih topik yang nak kito ikuit?
   Tak nampak ko "Follow Post" yang ado bulatan meghah ke gamba ateh tu? den cucok mato tu kang! Cuik yo menatang tu. Sanang kan?
   
   Kok alah manyampah nak ikuit topik tu, klik yo pado menu (cando nak oda mee ghabuih yo bunyi ea. hehehe) "Unfollow Post". Tobat posmen nak manganta ea laie. Kok di anta yo, ghabuih komputer tu duo haghi ampek malam.
   

Salapeh satiap kali pilihan dituka, jangan lak tutuit komputer tu jo sependa buntey tapuong cam kunci bak kato Abang Olan (Mazlan Majid). Kanolah disimpan pilihan tu bebaik kan? Jadi, kano lah takan butang "Save Changes".


Sekian yo la murid-murid. Cikgu nak lalok dah. hehehehe

Panduan berPesBuk 1 - Asas

Samakin ghamai yang mangguno an Pesbuk kini. Jadi, sabagai asas ingin yo den manyampai an babaghapo patuo mudah mangguno an Pesbuk ko:

1. Yang patamo sakali pastikan Pesbuk tu lah ado komuniket (kecek cologeh ni) atau alah ado sambongan ea. Untuok mamastikan ea, sanang yo. Lotak an panunjuok (cursor) tu kek namo sesapo dan tengok. Ado tak kalua gamba ea atau maklumat e cando ko:
   Kok tak ado makno ye baghu sapaghuoh fail yang dianta dek Pesbuk. "Loading" ea "incomplete". inilah manyababkan pasanan kito ilang satalah manakan butang "Enter". Janganlak kato ado urang yang hack atau ado urang yang buang (delete) pasanan kito, yo? hehehe
2. Kok bulieh jangan mulo an entri jo alamat/url cando alamat Youtube, website atau sabagai ea. Mulokan jo sapatah duo kato mukadimah sabagai topik. Iko untuok mamudah an kengkawan yang menyemak pasanan di emel.
3. JANGAN GUNOKAN HURUP GADANG (capital letters) cando ko sapajang entri atau komen. Mangikuit pemahaman urang yang biaso baceting (IRC), hurup gadang bamaksud tangah maghah yang sabana ea, anggak mambanggo dighi, manonjol dighi dek tak dilayan urang. Selain itu mungkin ado yang menyipat an kito KUGHANG AJA.
4. Satiap kali kito manakan butang ENTER mako komen kito akan taghuih dimasuok an lalu manjadi pasanan di sinan. Kok nak buek entri babaghieh-baghieh, takan butang "shift" jo "Enter" kek ujuong ayat tu. makno ea takan kaduo-duo butang tasabuit basamo-samo. Cando iko sanang nak bapantun, bagurindam, manyanyi atau bapuisi.
5. Kok marujuok an namo kawan yang ado pesbuk ea eloklah mangguno an namo yang didaftarkan kek sini supayo pasanan kito akan sampai kek wa'ea melalui emel. tantu an namo ea tapampang maso kito manaip dan klik pado namo yang tapampang cando di bawah ko:
   
   
6. Untuok pastikan pasanan sampai, pastikan pulo namo yang diklik tadi mampunyai kotak bighu di kalilieng ea cando iko:
   
7. Elakkan managuo isu sensitip sacagho tabuko di ruang utamo (wall). Itu guno ea ruangan pasanan (message). Cagho ea, klik namo dari senarai yang ado disabalah kanan. Kok namo ea tak ado kek sinan, paie profail ea dan klik pado butang "message" kek sabalah kanan namo ea.
8. Kok ingin babincang sasamo sandighi untuk babaghapo urang, guno an "Chat with Group". Jampuit babaghapo urang di siko. Cumo urang yang ado dalam senarai sandighi yo yang bulieh dijampuit.
   
9. Ado kalo ea kito tak dapek baco pasanan urang lain tautamo dalam "group chatting" sadangkan urang lain dok mangomen caghito ea. Salalu ea bondo cando iko balako dek sabab dio dan "BLOCKED" kito atau kito yang "blocked" dio. bukan virus doh. Jadi elakkan mam"blocked" urang lain supayo kito bulieh baco sado ea. kok tak suko pun kek urang itu, tutuit yo mato kek komen ea (ignore). Sakurang-kurang ea kito tau ujung ko, pangka ko atau tangah caghito.

Setakat ni yo lah kecek den, yo. Laen kali den usoho an buek panduan baghu.